بھنویں تراشنے پر ناراض شوہر نے بیوی کو تین طلاق دے دی، کیس درج

کانپور : شوہر نے اپنی بیوی کو بغیر اجازت کے بھنویں ترشوانے پر طلاق دے ڈالی۔ پولیس نے شوہر اور سسرال والوں کے خلاف مقدمہ درج کرلیا۔

رپورٹ کے مطابق اس جوڑے کا تعلق اتر پردیش کے شہر کانپور سے ہے۔ یہ غیر معمولی واقعہ اس وقت سامنے آیا جب خاتون نے پولیس کو اپنی طلاق کی اطلاع دی۔

بتایا جا رہا ہے کہ گل صبا نامی خاتون کا شوہر محمد سلیم سعودی عرب میں ملازمت کرتا ہے دونوں کی شادی گزشتہ سال کے آغاز میں ہوئی تھی۔

پولیس کے مطابق خاتون گل صبا نے شکایت کی تھی کہ اس کے سسرال والے اس کے شوہر کو جہیز کیلئے دباؤ ڈالنے پر اکساتے تھے۔

اس نے مزید الزام لگایا کہ 4 اکتوبر کو جب وہ اپنے ماموں کے گھر تھی، سلیم نے مجھے ویڈیو کال کی اور دیکھا کہ میری بھنویں بنی ہوئی ہیں۔

اس کے شوہر نے بغیر اجازت اس کے پلکنگ کروانے پر اعتراض کیا اور کہا کہ بغیر پوچھے ایسا کیوں کیا؟ اب میں تمہیں طلاق دے رہا ہوں، اس کے بعد شوہر نے ویڈیو کال پر تین طلاقیں دے دیں۔

پولیس کے مطابق خاتون کی شکایت پر اس کے شوہر، ساس اور 5 مزید سسرال والوں کے خلاف ایف آئی آر درج کرلی گئی ہے۔