یونیورسٹیوں اور کالجس میں طلبا کے لئے یونیفارم کا لزوم

لکھنو (پی ٹی آئی) گورنر اترپردیش آنندی بین پٹیل نے جمعرات کے روز ریاست کی تمام یونیورسٹیوں اور کالجس میں طلبا کے لئے یونیفارم لازمی قراردے دیا۔

آنندی بین پٹیل نے جو ریاست کی تمام یونیورسٹیوں کی چانسلر ہیں‘ چہارشنبہ کے روز جن بھون میں ایک میٹنگ کے دوران یہ ہدایت جاری کی۔ ایک سرکاری بیان میں کہا گیا کہ ان احکام کا اطلاق بلیا میں جن نائک چندرشیکھر یونیورسٹی سے ملحقہ تمام سرکاری اور امدادی کالجوں پر ہوگا۔

وزیر فینانس سریش کمار کھنہ نے اس اقدام کا خیرمقدم کیا اورکہا کہ گورنر کی جانب سے یونیورسٹیز میں ڈسپلن کی پابندی کے اقدامات نافذ کئے جارہے ہیں جو طلبا کے مفاد میں ہیں۔

گورنر نے اساتذہ کو بھی سخت ہدایات جاری کی ہیں اور کہا ہے کہ کسی بھی ٹیچر کو کسی ایسی حرکت میں ملوث نہیں ہونا چاہئے جس سے اس پیشہ کے وقار اور موقف کو نقصان پہنچتا ہو۔ انہوں نے اساتذہ کو ہدایت دی کہ وہ وقت پر کلاس میں پہنچیں اور طلبا کی باقاعدہ حاضری کو یقینی بنائیں۔