اردو اکیڈیمی کے مخدوم ایوارڈس و کارنامہ حیات ایوارڈس کا اعلان

حیدرآباد: تلنگانہ اردو اکیڈیمی کے زیر اہتمام ریاست کے اردو ادیبوں‘ اسکالرس‘ شاعروں‘ صحافیوں اور اردو زبان وادب کے فروغ کے سلسلہ میں کام کرنے والے اصحاب کی خدمات کو خراج پیش کرنے مخدوم ایوارڈ برائے سال 2019-23 (پانچ ایوارڈ) اسی طرح ”کارنامہ حیات ایوارڈ برائے سال 2018-20 تین سال کے 21 ایوارڈ دیئے جارہے ہیں۔

محمد خواجہ مجیب الدین صدر تلنگانہ ریاستی اردو اکیڈیمی نے اپنے صحافتی بیان میں ان ایوارڈز کی تفصیلات بتاتے ہوئے کہا کہ اردو زبان وادب کے فروغ کے سلسلہ میں کام کرنے والے اصحاب کو مخدوم ایوارڈ اور کارنامہ حیات ایوارڈ کے ضمن میں مختلف زمروں میں ہر سال ایوارڈز دیئے جاتے ہیں۔

ان ایوارڈز میں مخدوم ایوارڈ ہر سال تحقیق وتنقید‘ شاعری‘ فکشن‘ صحافت اور طنزو مزاح کسی ایک زمرہ میں ایک ایوارڈ اور کارنامہ حیات ایوارڈ میں ہر سال 7 ایوارڈ جن میں شاعری میں 2 ایوارڈز حضرت امجد حیدرآبادی ایوارڈ اور سعید شہیدی ایوارڈ‘ تنقیدو تحقیق میں ڈاکٹر محی الدین قادری زور ایوارڈ‘ نثر میں ڈاکٹر آغا حیدر حسن ایوارڈ‘ تعلیم وتدریس میں پروفیسر حبیب الرحمن ایوارڈ‘ صحافت میں محبوب حسین جگر ایوارڈ اور فروع اردو میں سرینواس لاہوٹی ایوارڈ شامل ہیں۔

انہوں نے کہا کہ مخدوم ایوارڈ اور کارنامہ حیات ایوارڈز کے لئے شخصیات کے انتخاب کے سلسلہ میں اردو زبان وادب کے ماہرین پر مشتمل دو علحدہ کمیٹیاں تشکیل دی گئی تھیں‘ ان کمیٹیوں نے اردو ادیبوں اسکالرس‘ شاعرو‘ صحافیوں اور اردو زبان وادب کے فروغ کے سلسلہ میں کام کرنے والے اصحاب کے ناموں پر کافی غورو خوض کے بعد شخصیات کا انتخاب کیا گیا۔

مخدوم ایوارڈ کے سلسلہ میں جملہ 5 سال کے ایوارڈ۔ (1 ڈاکٹر عقیل ہاشمی 2019 تحقیق وتنقید (2 جلال عارف 2020 شاعری (3 مظہر الزماں خان 2021 فکشن (4 عزیز احمد 2022 صحافت (5 پروفیسر حبیب ضیاء 2023 طنزو مزاح اور کارنامہ حیات 3 سال کے ہر سال 7 ایوارڈ کے حساب سے جملہ 21 ایوارڈ برائے سال 2018‘ (1 امجد حیدرآبادی ایوارڈ (شاعری) قاضی فاروق عارفی (2 سعید شہیدی ایوارڈ (شاعری) ڈاکٹر رحیم رامش (3 آغا حیدر حسن ایوارڈ (فکشن) محترمہ خیرالنساء علیم (4 ڈاکٹر محی الدین قادری زور ایوارڈ (تحقیق وتنقید) ڈاکٹر فضل اللہ مکرم (5 پروفیسر حبیب الرحمن ایوارڈ (تعلیم وتدریس) ڈاکٹر مفتی محمد مستان علی (6 محبوب حسین جگر ایوارڈ (صحافت) ڈاکٹر سید فاضل حسین پرویز (7 سرینواس لاہوٹی ایوارڈ (فروغ اردو) باقر مرزا ان شخصیات کو دیئے جارہے ہیں۔

برائے سال 2019‘ (1 امجد حیدرآبادی ایوارڈ (شاعری) سمیع اللہ سمیع (2 سعید شہیدی ایوارڈ (شاعری) سید یوسف روش (3 آغا حیدر حسن ایوارڈ (فکشن) محمد مجیب احمد (4 ڈاکٹر محی الدین قادری زور ایوارڈ (تحقیق وتنقید) اسلم عمادی (5 پروفیسر حبیب الرحمن ایوارڈ (تعلیم وتدریس) ڈاکٹر محمد انور الدین (6 محبوب حسین جگر ایوارڈ (صحافت) محمد طاہر رومانی (7 سرینواس لاہوٹی ایوارڈ (فروغ اردو) ڈاکٹر عابد معز ان شخصیات کو دیئے جارہے ہیں۔

برائے سال 2020‘ (1 امجد حیدرآبادی ایوارڈ (شاعری) ڈاکٹر راہی (2 سعید شہیدی ایوارڈ (شاعری) چچا پالموری (3 آغا حیدر حسن ایوارڈ (فکشن) رحیم انور (4 ڈاکٹر محی الدین قادری زور ایوارڈ (تحقیق وتنقید) ڈاکٹر عبدالقدیر مقدر (5 پروفیسر حبیب الرحمن ایوارڈ (تعلیم وتدریس) سید رؤف ریحان (6 محبوب حسین جگر ایوارڈ (صحافت) محمد فہیم الدین (7 سرینواس لاہوٹی ایوارڈ (فروغ اردو) اشفاق راشد ان شخصیات کو دیئے جارہے ہیں۔ محمد خواجہ مجیب الدین نے اپنے صحافتی بیان میں بتایا کہ مخدوم ایوارڈ فی کس مبلغ 2 لاکھ روپے مومنٹو اور توصیف نامہ پر مشتمل ہے اور کارنامہ حیات ایوارڈ فی کس مبلغ 50 ہزار روپے مومنٹو اور توصیف نامہ پر مشتمل ہے۔

انہوں نے کہا کہ مخدوم ایوارڈ کی 5 منتخب شخصیات اور کارنامہ حیات ایوارڈ کی 21 منتخب شخصیات کو یہ ایوارڈ 11 جون 2023 کو تشکیل ریاست تلنگانہ کی 10 ویں یوم تاسیس تقاریب کے سلسلہ میں رویندرا بھارتی آڈیٹوریم میں 9:30 بجے صبح منعقد ہونے والی تقریب میں پیش کئے جائیں گے اور مشاعرہ بھی منعقد ہوگا۔

صدر تلنگانہ ریاستی اردو اکیڈیمی نے بتایا کہ ان دونوں ایوارڈوں کے تمام منتخب اصحاب کو اطلاع کردی گئی ہے۔ انہوں نے تمام منتخب شخصیات سے خواہش کی ہے کہ وہ مقررہ وقت پر رویندرا بھارتی آڈیٹوریم پر حاضر رہیں۔