سب سے پہلے آر ایس ایس پر پابندی لگائیں: لالوپرساد یادو

پٹنہ: راشٹریہ جنتا دل (آر جے ڈی) کے صدر لالو پرساد یادو نے پاپولر فرنٹ آف انڈیا (پی ایف آئی) اور راشٹریہ سویم سیوک سنگھ (آر ایس ایس) کو سماج میں نفرت اور بغض پھیلانے والا قرار دیتے ہوئے کہا کہ ان دونوں تنظیموں پر پابندی عائد کی جانی چاہیئے چہارشنبہ کو ایک ٹویٹ میں یادو نے کہاکہ”آر ایس ایس سمیت پی ایف آئی جیسی تمام نفرت انگیز اور بددیانت تنظیموں پر پابندی لگائی جانی چاہئے۔

سب سے پہلے آر ایس ایس پر پابندی لگائیں، یہ اس سے بھی بدتر تنظیم ہے۔ آر ایس ایس پر پہلے بھی دو بار پابندی لگ چکی ہے۔ یاد رہے آر ایس ایس پر سب سے پہلے پابندی مرد آہن سردار پٹیل نے لگائی تھی۔

وہیں بہار کے دیہی ترقی کے وزیر اور جنتا دل یونائیٹڈ (جے ڈی یو) کے سینئر لیڈر شراون کمار نے ایک قدم آگے بڑھتے ہوئے آر جے ڈی صدر سے پی ایف آئی اور آر ایس ایس کے ساتھ ساتھ بھارتیہ جنتا پارٹی (بی جے پی) پر پابندی لگانے کی بات کہہ دی۔

نتیش کمار نے چہارشنبہ کو یہاں جے ڈی (یو) کے ریاستی دفتر میں منعقد پروگرام ‘کارکنوں کے دربار میں معزز وزیر’ کے بعد صحافیوں کے ایک سوال کا جواب دیتے ہوئے مسٹر نتیش کمار نے کہا کہ بی جے پی اور آر ایس ایس دونوں پر پابندی لگنی چاہیے۔

 پی ایف آئی پر پابندی سے متعلق ایک سوال کے جواب میں انہوں نے کہا کہ معاشرے میں عدم مساوات، تناؤ اور نفرت پھیلانے والی تمام تنظیموں پر پابندی لگنی چاہیے۔

وزیر نے جے ڈی یو میں ایک بادشاہ اور باقی سب کو نوکر بتانے والے بی جے پی لیڈر کے بیان پر ردعمل ظاہر کرتے ہوئے کہا کہ جب سے چیف منسٹر نتیش کمار نے بی جے پی کو دودھ کی مکھی کی طرح باہر پھینکا ہے، تب سے اس کے لیڈر مشتعل ہیں۔