نوی ممبئی میونسپل کارپوریشن کی اسکالرشپ : طلباء کے لیے آن لائن درخواستیں طلب

ممبئی: نوی ممبئی میونسپل کارپوریشن (NMUMPA) نے تعلیمی سال 2025-26 کے لیے اپنی اسکالرشپ اسکیم کا اعلان کر دیا ہے، جس کے تحت نوی ممبئی کے دائرہ اختیار میں پرائمری سے لے کر کالج تک تعلیم حاصل کرنے والے غریب اور ضرورت مند طلباء کو مالی مدد فراہم کی جائے گی۔ اس اسکیم کے لیے آن لائن درخواستیں طلب کی گئی ہیں اور اسے مختلف سماجی و اقتصادی زمرہ جات میں تقسیم کیا گیا ہے۔

اس اسکیم کے تحت بیواؤں، طلاق یافتہ خواتین کے بچوں، یتیموں، معاشی طور پر کمزور طبقات سے تعلق رکھنے والے طلباء، پسماندہ طبقات کے ہونہار طلباء، مقامی پروجیکٹ سے متاثرہ خاندانوں کے بچے، صفائی ملازمین، کنٹریکٹ ورکرز اور کان، بندرگاہ یا تعمیراتی مزدوروں کے بچوں کو وظائف دیے جائیں گے۔

اسکالرشپ کی رقم تعلیمی سطح کے مطابق اس طرح طے کی گئی ہے: پہلی سے چوتھی جماعت کے طلباء کو 4,000 روپے، پانچویں سے ساتویں تک 6,000 روپے، آٹھویں سے دسویں تک 8,000 روپے، گیارہویں سے بارہویں تک 9,600 روپے، گریجویشن کے طلباء کو 12,000 روپے، پوسٹ گریجویشن کے لیے 16,000 روپے، اور پیشہ ورانہ یا تکنیکی تربیت حاصل کرنے والے طلباء کو 8,000 روپے دیے جائیں گے۔

اس اسکیم کے تحت رجسٹریشن کے لیے ویب سائٹ www.schemenmmc.com پر آن لائن رجسٹریشن ضروری ہے۔ اہل طلباء 20 جون 2025 سے 31 جولائی 2025 تک رجسٹریشن کرا سکتے ہیں، جبکہ مکمل درخواستیں 15 اگست 2025 تک آن لائن فارم کے ذریعے دی جا سکتی ہیں۔ نوی ممبئی میونسپل کارپوریشن نے علاقے کے تمام مستحق طلباء سے اپیل کی ہے کہ وہ اس اسکالرشپ اسکیم سے بھرپور فائدہ اٹھائیں۔