شربت جہاد” ویڈیو نے پیدا کی نئی بحث، بابا رام دیو پر مقدمے کا مطالبہ

بھوپال:کانگریس کے سینئر رہنما اور رکن پارلیمنٹ دگ وجے سنگھ نے بابا رام دیو کے خلاف ایف آئی آر درج کرنے کا مطالبہ کیا ہے۔ انہوں نے یہ شکایت ٹی ٹی نگر پولیس اسٹیشن، بھوپال میں درج کروانے کی بات کہی ہے۔

انہوں نے بابا رام دیو کی متنازعہ ویڈیو، جسے "شربت جہاد” کہا جا رہا ہے، کا حوالہ دیتے ہوئے الزام لگایا کہ رام دیو مذہب کے نام پر اپنے پروڈکٹس کی مارکیٹنگ کر رہے ہیں اور عوام کے مذہبی جذبات کو بھڑکا رہے ہیں۔

دگ وجے سنگھ نے مطالبہ کیا کہ بابا رام دیو کے خلاف بی این ایس 2023 کی دفعات 196(1)(a) اور 299 کے تحت اور آئی ٹی ایکٹ کے مطابق ایف آئی آر درج کی جائے۔

انہوں نے مزید کہا کہ بابا رام دیو نے ماضی میں بھی جھوٹے دعوے کیے، چاہے وہ کووڈ-19 کی دوائیاں ہوں یا ٹوتھ پیسٹ، اور ان جھوٹے دعوؤں سے فائدہ کمایا۔

اس معاملے نے سیاسی اور سماجی سطح پر نئی بحث کو جنم دیا ہے، اور پولیس کی جانب سے تحقیقات کا امکان ظاہر کیا جا رہا ہے۔