گلوکار پر نوٹوں کی بارش کی حیران کن ویڈیو

احمد آبادـ گجرات میں مشہور لوک گلوکار اور بھجن گائیک کوی راج جگنیش دادا کے پروگرام کی ایک ویڈیو سوشل میڈیا پر تیزی سے وائرل ہو رہی ہے، جس میں مداح ان پر نوٹوں کی بارش کرتے نظر آ رہے ہیں۔ بتایا جا رہا ہے کہ یہ منظر گجرات کے مالیا ہاٹینا میں منعقد ایک مذہبی پروگرام کے دوران دیکھنے کو ملا، جہاں عقیدت مند بھکتی کے رنگ میں ڈوبے ہوئے تھے۔

وائرل ویڈیو میں دیکھا جا سکتا ہے کہ کوی راج جگنیش اسٹیج پر بھجن پیش کر رہے ہیں، جبکہ پیچھے کھڑے کچھ لوگ ان پر نوٹ نچھاور کر رہے ہیں۔ اس دوران اسٹیج کے چاروں طرف صرف نوٹ ہی نوٹ دکھائی دیتے ہیں۔ اطلاعات کے مطابق، یہ پروگرام گجرات کے کھمبالیا گاؤں میں منعقد “بھگوت سَپتاہ گیان یگیہ” کا حصہ تھا، جہاں شری کرشن بھکتی اور دوستی پر مبنی بھجنوں نے سامعین کو جذباتی کر دیا۔

جیسے جیسے پروگرام آگے بڑھتا گیا، عقیدت مند اسٹیج کے قریب پہنچ کر دل کھول کر نوٹ لٹاتے رہے۔ اس ویڈیو کے وائرل ہونے کے بعد سوشل میڈیا صارفین کی جانب سے ملا جلا ردعمل سامنے آ رہا ہے۔ کچھ لوگ اسے عقیدت کا اظہار قرار دے رہے ہیں، جبکہ کئی صارفین مزاحیہ تبصرے کرتے ہوئے کہہ رہے ہیں، “زندگی ہو تو ایسی!”

کوی راج جگنیش دادا گجرات کے معروف روحانی بھجن گائیک اور بھاگوت کتھا کار ہیں، جو “رادھے-رادھے” کے نام سے بھی کافی مشہور ہیں۔ ان کے پروگراموں میں بڑی تعداد میں عقیدت مند شریک ہوتے ہیں اور اکثر ان پر نوٹوں کی بارش بھی کی جاتی ہے۔