کئی روز محاصرہ کے بعد 41 نومولودوں کی الشفا ہاسپٹل سے منتقلی (دل دہلادینے والے ویڈیو)

غزہ: غزہ کے ہسپتالوں کے ڈائرکٹر محمد زقوت نے اعلان کیا ہے کہ کئی روز کے محاصرہ کے بعد بالآخر غزہ کے الشفا میڈیکل کامپلکس سے تمام 41 قبل از وقت پیدا ہونے والے بچوں کو نکال لیا گیا ہے۔

العربیہ/الحدث کے نمائندہ نے اتوار کو اطلاع دی کہ بچے رفح کے اماراتی ہسپتال پہنچے ہیں۔ 3 بچے راستہ میں ہی دم توڑ گئے۔ انہوں نے نشاندہی کی کہ بچوں کو کل مصری سرزمین پر منتقل کر دیا جائے گا۔

مقامی مصری میڈیا کے مطابق یہ سب اس وقت ہوا جب رفح کراسنگ سے ایمبولینسس غزہ میں داخل ہوئیں تاکہ بچوں کو صحت کی دیکھ بھال کے لیے مصر کی طرف لے جایا جا سکے۔

فلسطینی ہلال احمر نے وضاحت کی کہ اس کی ایمبولنس کے عملہ نے اتوار کے روز عالمی ادارہ صحت اور اقوام متحدہ کے دفتر برائے انسانی ہمدردی کے رابطہ کے ساتھ مل کر غزہ کے شفا ہاسپٹل سے قبل از وقت پیدا ہونے والے درجنوں بچوں کو نکالنے میں کامیابی حاصل کی۔

انہوں نے اپنے فیس بک پیج پر ایک پوسٹ میں مزید کہا کہ قبل از وقت نومولود بچوں کو چند روز قبل محصور طبی مرکز سے ایمبولنسوں کے ذریعہ جنوب کو منتقل کیا گیا تھا۔ ان بچوں کو مصر کے شہر رفح میں ایمریٹس ہاسپٹل منتقل کیا جارہاہے۔

فلسطینی وزارت صحت نے اعلان کیا تھا کہ بچوں کو نکالے جانے سے قبل 120 زخمی افراد شفا ہاسپٹل میں موجود تھے۔ورلڈ ہیلت آرگنائزیشن (ڈبلیو ایچ او) کا اندازہ ہے کہ لگ بھگ 2,300 لوگ اب بھی میڈیکل کامپلکس میں پھنسے ہوئے ہیں۔