دن دہاڑے خاتون پر حملہ، سرعام پٹائی اور دھمکیاں، ویڈیو وائرل
جب یہ تشدد جاری تھا، تو وہاں موجود ایک دوسری خاتون نے ہمت دکھاتے ہوئے مداخلت کی اور حملہ آور کو وارننگ دی کہ اس کی اس حرکت کی ویڈیو بنائی جا رہی ہے۔ تاہم، ملزم نے پیچھے ہٹنے کے بجائے اس خاتون پر بھی حملہ کرنے کی کوشش کی اور اسے سنگین نتائج کی دھمکیاں دیں۔
ممبئی: عروس البلاد کے علاقے ملاڈ (مالوانی) سے ایک انتہائی دل دہلا دینے والی ویڈیو منظرِ عام پر آئی ہے، جس میں ایک شخص کو دن دیہاڑے ایک خاتون پر بے رحمانہ تشدد کرتے ہوئے دیکھا جا سکتا ہے۔ اس واقعہ نے شہر میں خواتین کے تحفظ اور امن و امان کی صورتحال پر کئی سوالات کھڑے کر دئے ہیں۔
سوشل میڈیا پر وائرل ہونے والی اس ویڈیو میں دیکھا جا سکتا ہے کہ ایک مصروف سڑک پر ایک شخص اور خاتون کے درمیان پہلے تلخ کلامی ہوتی ہے۔ دیکھتے ہی دیکھتے معاملہ طول پکڑ جاتا ہے اور وہ شخص (جس کے بارے میں شبہ ہے کہ وہ نشے کی حالت میں تھا) آپے سے باہر ہو کر خاتون پر مکوں اور تھپڑوں کی بارش کر دیتا ہے۔
جب یہ تشدد جاری تھا، تو وہاں موجود ایک دوسری خاتون نے ہمت دکھاتے ہوئے مداخلت کی اور حملہ آور کو وارننگ دی کہ اس کی اس حرکت کی ویڈیو بنائی جا رہی ہے۔ تاہم، ملزم نے پیچھے ہٹنے کے بجائے اس خاتون پر بھی حملہ کرنے کی کوشش کی اور اسے سنگین نتائج کی دھمکیاں دیں۔
ویڈیو میں دیکھا جا سکتا ہے کہ جس وقت یہ واقعہ پیش آیا، وہاں کئی راہگیر موجود تھے لیکن کسی نے بھی فوری طور پر ملزم کو روکنے کی کوشش نہیں کی۔
ویڈیو کے اختتام پر دیکھا جا سکتا ہے کہ ایک شہری نے مداخلت کر کے دوسری خاتون کو بچایا، جس کے بعد ملزم وہاں سے دوڑتے ہوئے فرار ہو گیا۔
فوری طور پر یہ واضح نہیں ہو سکا ہے کہ آیا حملہ آور اور متاثرہ خاتون ایک دوسرے کو پہلے سے جانتے تھے یا یہ کوئی رینڈم حملہ تھا۔ پولیس کی جانب سے ابھی تک اس معاملے میں کسی باقاعدہ گرفتاری یا قانونی کارروائی کی تصدیق نہیں کی گئی ہے۔
سوشل میڈیا پر شہری اس ویڈیو کو شیئر کرتے ہوئے ممبئی پولیس سے ملزم کے خلاف سخت ترین کارروائی کا مطالبہ کر رہے ہیں۔
