دن دہاڑے 4 سالہ بچی کا اغوا، دادا دادی نے جان خطرے میں ڈال دی، ویڈیو وائرل
پنجاب کے ضلع موہالی کے قصبے کرالی سے ایک انتہائی تشویشناک اور دل دہلا دینے والا معاملہ سامنے آیا ہے، جہاں ایک چار سالہ معصوم بچی کو اس کے گھر کے باہر سے دن دیہاڑے اغوا کر لیا گیا۔
موہالی (پنجاب): پنجاب کے ضلع موہالی کے قصبے کرالی سے ایک انتہائی تشویشناک اور دل دہلا دینے والا معاملہ سامنے آیا ہے، جہاں ایک چار سالہ معصوم بچی کو اس کے گھر کے باہر سے دن دیہاڑے اغوا کر لیا گیا۔ یہ تمام واقعہ وہاں لگے سی سی ٹی وی (CCTV) کیمرے میں قید ہو گیا ہے، جس کی ویڈیو سوشل میڈیا پر گیا۔
تفصیلات کے مطابق، بچی اپنے دادا کے ساتھ گھر کے باہر ایک اسکوٹر پر بیٹھی ہوئی تھی۔ اسی دوران جب اس کی دادی گھر کا گیٹ کھولنے کے لیے تھوڑا آگے بڑھیں، تو موٹر سائیکل پر سوار دو نامعلوم افراد وہاں پہنچے۔
حملہ آوروں نے اچانک بچی کو چھیننے کی کوشش کی، جس پر بزرگ دادا دادی نے بہادری کا مظاہرہ کرتے ہوئے اغوا کاروں کا مقابلہ کیا۔ سی سی ٹی وی فوٹیج میں دیکھا جا سکتا ہے کہ بزرگ جوڑا چیخ و پکار کرتے رہے۔ تاہم، اغوا کار بزرگ جوڑے کو زبردستی پیچھے دھکیلنے اور بچی کو چھین کر سیکنڈوں میں فرار ہونے میں کامیاب ہو گئے۔
عینی شاہدین اور ویڈیو کے مطابق، بزرگ دادا دادی نے اغوا کاروں کی گاڑی کو روکنے کے لیے اپنی جان بھی خطرے میں ڈالی اور پڑوسیوں کی مدد کے لیے مسلسل شور مچاتے رہے، لیکن ملزمین پڑوسیوں کے پہنچنے سے پہلے ہی تیز رفتاری سے فرار ہو گئے۔
اس چونکا دینے والے واقعے کے بعد بچی کے والد کا ایک بڑا بیان سامنے آیا ہے۔ والد نے دعویٰ کیا ہے کہ یہ اغوا ان کا اپنی بیوی کے ساتھ جاری بچے کی تحویل (Custody Dispute) کے دیرینہ تنازع کا نتیجہ ہے۔
والد کے مطابق، بچی کی تحویل کا معاملہ اس وقت عدالت میں زیر سماعت ہے۔ انہوں نے پولیس انتظامیہ سے سخت اور غیر جانبدارانہ کارروائی کا مطالبہ کیا ہے۔
پنجاب پولیس نے واقعے کا نوٹس لیتے ہوئے فوری طور پر تحقیقات کا آغاز کر دیا ہے۔
پولیس حکام کا کہنا ہے کہ وہ والد کی طرف سے لگائے گئے کسٹڈی کے الزامات کی بھی تصدیق کر رہے ہیں تاکہ یہ واضح ہو سکے کہ یہ کوئی مجرمانہ اغوا ہے یا خاندانی تنازع کا حصہ۔
