آبنائے ہرمز کھولنے میں چین مدد کرے گا، ٹرمپ کا دعویٰ

بیجنگ: امریکی صدر ڈونلڈ ٹرمپ نے کہا ہے کہ وہ ایران کے معاملے پر مزید صبر نہیں کریں گے اور ایران کو واشنگٹن کے ساتھ معاہدہ کرنا ہو گا۔فوکس نیوز کو دیے گئے ایک انٹرویو میں صدر ٹرمپ نے کہا، ’’میں مزید صبر سے کام نہیں لوں گا، انہیں ایک معاہدے تک پہنچنا ہو گا۔‘‘

چین کے دورے کے دوران بیجنگ میں گفتگو کرتے ہوئے امریکی صدر نے کہا کہ اگر امریکہ ایران سے افزودہ شدہ یورینیم حاصل کر لیتا ہے تو وہ زیادہ اطمینان محسوس کریں گے۔

انہوں نے کہا کہ ان کے خیال میں اس معاملے کا تعلق کسی بھی دوسری چیز سے زیادہ ’’پروپیگنڈے‘‘ سے ہے۔

صدر ٹرمپ نے مزید کہا کہ امریکہ دوبارہ حملہ بھی کر سکتا ہے۔ ان کا اشارہ ان حملوں کی طرف تھا جو امریکہ نے گزشتہ برس ایران کی اہم جوہری تنصیبات پر کیے تھے۔

اس کے باوجود امریکی صدر نے تسلیم کیا کہ ایرانی قیادت، جس کے ساتھ ان کی انتظامیہ مذاکرات کر رہی ہے، ’’عقل مند‘‘ ہے۔

رپورٹس کے مطابق ایران نے اب تک افزودہ شدہ یورینیم کے مقام کی تصدیق نہیں کی، جبکہ بعض ماہرین کا خیال ہے کہ یہ مواد زمین کی گہرائی میں محفوظ کیا گیا ہو سکتا ہے، جس تک رسائی درست انٹیلی جنس معلومات کے بغیر انتہائی مشکل سمجھی جاتی ہے۔

ڈونلڈ ٹرمپ نے اس موقع پر یہ بھی کہا کہ چینی صدر شی جن پنگ ایران پر اثر انداز ہونے کی صلاحیت رکھتے ہیں۔

امریکی صدر کے مطابق شی جن پنگ نے آبنائے ہرمز کو دوبارہ کھولنے میں مدد کی پیشکش کی ہے اور اس بات کا عہد بھی کیا ہے کہ چین امریکہ اور اسرائیل کے خلاف جنگ میں ایران کو فوجی ساز و سامان فراہم نہیں کرے گا۔