مذہب کے نام پر مسلمانوں کو تحفظات، وزیر اعظم کا الزام گمراہ کن: محمد علی شبیر

حیدرآباد: حکومت تلنگانہ کے مشیر محمدعلی شبیر نے آج کانگریس پر مسلمانوں کو مذہب کے نام پر 4فیصد تحفظات دینے سے متعلق وزیر اعظم نریندر مودی کے الزام کو جھوٹ اور گمراہ کن قرار دیا اور

کہا کہ کانگریس کی راج شیکھر ریڈی کی حکومت میں سماجی اور معاشی پسماندگی کی بنیاد پر تعلیم اور روزگار میں مسلمانوں کو 4فیصد تحفظات فراہم کئے تھے اور یہ تحفظات ایس سی، ایس ٹی اور بی سی طبقات سے چھین کر نہیں دئیے گئے

بلکہ سپریم کورٹ کے احکام کے مطابق کمزور طبقات کو حاصل 46فیصد تحفظات میں 4فیصد اضافہ کرکے مسلمانوں کو دئیے گئے تاکہ 50فیصد کی حد سے تجاوز نہ ہوسکے۔

محمد علی شبیر، آج کورٹلہ میں حلقہ لوک سبھا نظام آباد کے کانگریس امیدوار ٹی جیون ریڈی کے انتخابی جلسہ سے خطاب کررہے تھے۔

انہوں نے کہا کہ نریندر مودی مذہب کے نام پر ہندوؤں اور مسلمانوں میں نفرت پیدا کرنے کی کوشش کررہے ہیں۔مودی کا یہ کہنا ”میں جب تک زندہ ہوں مسلمانوں کو حاصل تحفظات چھین کر دلتوں اور دیگر طبقات کو واپس کروں گا“تعجب خیز ہے۔