یوپی کے دیوریا میں ٹرالی بیگ سے نوجوان کی لاش برآمد، قتل میں بیوی سمیت چار افراد زیرِ حراست

دیوریا: اتر پردیش کے ضلع دیوریا کے پکڑی پتخولی گاؤں کے گندم کے کھیت میں ایک ٹرالی بیگ سے نوجوان کی لاش برآمد ہوئی ہے، جس کی شناخت نوشاد ولد عبدالرزاق کے طور پر ہوئی ہے۔ پولیس کو لاش والے بیگ سے پاسپورٹ ملا، جس کے ذریعے مقتول کی شناخت ممکن ہو سکی۔ اس قتل کے سلسلے میں پولیس نے ایک خاتون سمیت چار افراد کو حراست میں لے لیا ہے۔

پولیس ذرائع کے مطابق نوشاد، جو کہ بھتولی گاؤں کا رہائشی تھا، دس روز قبل سعودی عرب سے واپس لوٹا تھا۔ وہ کئی سالوں سے بیرونِ ملک مقیم تھا اور حال ہی میں اپنے گاؤں میں نیا گھر تعمیر کرایا تھا جہاں اس کے والد، اہلیہ اور بیٹی رہائش پذیر تھے۔ سعودی عرب سے واپسی پر وہ دو ٹرالی بیگ ساتھ لایا تھا جن میں سے ایک میں اس کا پاسپورٹ تھا۔

ابتدائی تفتیش میں شبہ ظاہر کیا جا رہا ہے کہ نوشاد کا قتل مبینہ طور پر ایک ناجائز تعلق کے سبب ہوا ہے۔ اس کی لاش کو ٹرالی بیگ میں رکھ کر تقریباً 60 کلومیٹر دور پھینک دیا گیا۔ شناخت کے بعد پولیس نے نوشاد کے گھر کی تلاشی لی جہاں ایک بیگ پر خون کے دھبے پائے گئے اور دیگر اہم شواہد اکٹھے کیے گئے۔

پولیس نے نوشاد کی بیوی کو پوچھ گچھ کے لیے حراست میں لیا، جس نے مبینہ طور پر اپنے بھانجے کے گھر کا پتہ دیا جہاں ایک مشتبہ شخص چھپا ہوا تھا۔ اس مشتبہ شخص کی ماں اور بہنوں کو بھی تفتیش کے لیے حراست میں لیا گیا ہے۔ قتل کے بعد مقتول کے والد کو یہ کہہ کر گمراہ کیا گیا کہ نوشاد رشتہ داروں کے یہاں گیا ہے۔

ترکولوا پولیس واقعے کی مکمل تحقیقات کر رہی ہے اور علاقے کی سی سی ٹی وی فوٹیج چیک کی جا رہی ہے تاکہ معلوم ہو سکے کہ لاش کو کس گاڑی کے ذریعے منتقل کیا گیا۔ اب تک کوئی مضبوط سراغ ہاتھ نہیں آیا ہے، اور تفتیش جاری ہے۔