سعودی عرب میں خواتین کی پہلی بار فوجی پریڈ میں شرکت
سعودی عرب میں خواتین نے پہلی بار فوجی پریڈ فدا میں شرکت کی، جس میں 2 ہزار سے زائد مرد و خواتین شامل تھے۔
ریاض: سعودی عرب میں خواتین نے پہلی بار فوجی پریڈ فدا میں شرکت کی، جس میں 2 ہزار سے زائد مرد و خواتین شامل تھے۔
عرب میڈیا کی رپورٹس کے مطابق پریڈ میں سعودی عرب کی وزارتِ داخلہ کے 16 سیکیورٹی کے شعبوں کے ارکان شریک ہوئے، ہتھیاروں سے لیس پریڈ میں پہلی بار آرکسٹرا بھی متعارف کرایا گیا ہے۔
اس موقع پر شرکاء نے فوجی نظم و ضبط اور ربط میں انفرادی مہارتیں پیش کیں جبکہ فوجی میوزیکل پرفارمنس کا بھی انعقاد کیا گیا، جس میں سعودی ریاست کا قیام، سلامتی اور تحفظ کی بحالی کے عزم کا اعادہ کیا گیا۔
وزارت ثقافت نے“فاؤنڈیشن مارچ”کی سرگرمی کا اہتمام کیا تھا جو دارالحکومت ریاض کے شہزادہ ترکی بن عبدالعزیز اول روڈ پر منعقد کی گئی، اس مارچ میں وزارت داخلہ کی فوجی پریڈ اور دیگر مشہور فنکاروں کی پرفارمنس بھی شامل تھی۔
اس کے علاوہ اس سعودی فوجی پریڈ ‘فدا’ میں پہلی بار آرکسٹرا بھی متعارف کرایاگیا۔عرب میڈیا کے مطابق یہ پریڈ سعودی ریاست کے قیام کے بعد سے سلامتی کے پیغام کے طور پرکی جاتی ہے، فوجی پریڈ کا عنوان ’فدا‘ رکھا گیا ہے جس سے ظاہر ہوتا ہیکہ سعودی فوج کے یہ سپوت وطن کے لیے اپنی جان فدا کرنے کے لیے تیار ہیں۔