اے آئی بی اے کا گوگل کے خلاف مودی کو مکتوب

نئی دہلی: آل انڈیا بار ایسوسی ایشن (اے آئی بی اے) نے وزیر اعظم نریندر مودی کو ایک خط لکھا ہے جس میں ٹکنالوجی کی بڑی کمپنی گوگل پر عوامی ڈومین میں گمراہ کن اور شرارتی اطلاعات ڈال کر وزیر اعظم کی شبیہ کو خراب کرنے کی کوشش کرنے کا الزام لگاتے ہوئے تعزیری کارروائی کا مطالبہ کیا گیا ہے۔

صدر ڈاکٹر آدیش سی اگروال نے کہا کہ گوگل نے عوامی ڈومین میں گمراہ کن اور شرارتی معلومات رکھ کر گروپوں کے درمیان دشمنی کو فروغ دینے سے متعلق تعزیرات ہند کی دفعات کے تحت جرم کیا ہے۔

سپریم کورٹ بار ایسوسی ایشن (ایس سی بی اے) کے صدر ڈاکٹر اگروال نے کہا کہ گوگل کے مصنوعی ذہانت کے پلیٹ فارم جیمنی نے وزیر اعظم ہند کے بارے میں انتہائی قابل مذمت غلط معلومات پبلک ڈومین میں ڈالی ہیں۔

خط میں کہا گیا ہے کہ "کمپنی مشین کی مینوفیکچرر ہونے کے ناطے مشین سے ہونے والے نقصان کے نتائج سے بچ نہیں سکتی ہے۔”

ایک مشین کس طرح حقائق کو سیکھتی ہے اور ان کی تشریح کرتی ہے اسے اس کے پروگرامر نے ڈیزائن کیا ہے۔اس میں کہا گیا ہے کہ ملک عام انتخابات کے دہانے پر ہے اور کسی بھی رہنما کی شبیہ کو خراب کرنے کی بدنیتی پر مبنی مہم بند ہونی چاہیے۔

خط کے مطابق "وزیراعظم نے ہندوستان کو اس کا صحیح مقام دلانے کی کوشش کی ہے۔ لیکن کچھ لوگ ملک کی ترقی سے پرجوش نہیں ہیں اور وہ نفرت پھیلا کر ان کی عزت کو داغدار کرنا چاہتے ہیں۔

اس طرح کی سرگرمیوں پر قابو پانا چاہیے۔ اس لیے درخواست کی جاتی ہے کہ تعزیری قانون نافذ کیا جائے اور مذکورہ جرائم کے ذمہ داروں کے خلاف کارروائی کی جائے۔