ریلس کے چکر میں ماں نے بچہ کی جان خطرے میں ڈال دی، "ممی بچاؤ” کی چیختی ہوئی ویڈیو وائرل

نئی دہلی: انٹرنیٹ پر وائرل ہونے والی ایک دل دہلا دینے والی ویڈیو نے سوشل میڈیا صارفین کو شدید غصے اور تشویش میں مبتلا کر دیا ہے۔ اس مبینہ ویڈیو میں ایک ماں کو صرف چند ویوز، لائکس اور فالوورز حاصل کرنے کے لیے اپنے ہی معصوم بچے کی زندگی کو خطرے میں ڈالتے ہوئے دکھایا گیا ہے۔

رپورٹس کے مطابق، وائرل کلپ میں دیکھا جا سکتا ہے کہ ایک ماں نے ریل (Reel) بنانے کے دوران اپنے بچے کے گلے میں رسی ڈال رکھی ہے۔ خوفزدہ اور پریشان حال بچہ مبینہ طور پر تڑپتے ہوئے "ممی بچاؤ” کی آوازیں لگا رہا ہے، لیکن ماں بچے کو بچانے اور رسی ہٹانے کے بجائے مسلسل ویڈیو شوٹ کرتی رہی۔

ویڈیو سامنے آنے کے بعد شدید ردعمل دیکھنے کو مل رہا ہے۔ لوگوں نے اس واقعے کو "سنگین غفلت”، "غیر انسانی” اور "مجرمانہ عمل” قرار دیا ہے۔ صارفین کا کہنا ہے کہ رسی کا معمولی سا جھٹکا بھی معصوم بچے کے لیے جان لیوا ثابت ہو سکتا تھا، اور اب بچوں کو محض آن لائن شہرت کے لیے کھلونے کے طور پر استعمال کیا جا رہا ہے۔

وائرل ہونے اور راتوں رات مشہور ہونے کی چاہت نے والدین کو اس حد تک اندھا کر رہا ہے کہ وہ اپنے بچوں کی سلامتی کو بھی داؤ پر لگا رہے ہیں۔

اس واقعے نے اس بات کو بھی اجاگر کیا ہے کہ اسمارٹ فونز کی آسان رسائی کے بعد اب چھوٹے شہروں اور دیہاتی علاقوں میں بھی سوشل میڈیا کی لت خاندانی اقدار اور والدین کے رویوں کو بری طرح متاثر کر رہی ہے۔