سوڈان میں پھنسے ہندوستانیوں کو لانے آپریشن کاویری شروع

نئی دہلی: تقریباً 500 ہندوستانی آپریشن کاویری کے تحت پورٹ سوڈان پہنچ گئے جو بحران زدہ ملک سوڈان سے ہندوستانی شہریوں کے انخلاء کے لئے شروع کیا گیا ہے۔

وزیر خارجہ ایس جئے شنکر نے پیر کے دن ٹویٹ کرکے بتایا کہ تقریباً 500 ہندوستانی پورٹ سوڈان پہنچ گئے ہیں اور مزید راستہ میں ہیں۔ ہمارے بحری جہاز اور طیارے انہیں لانے کے لئے بھیجے گئے ہیں۔

ہندوستان نے سعودی عرب کے شہر جدہ میں 2 ہیوی لفٹ ملٹری ٹرانسپورٹ طیارے تیار رکھے ہیں۔ سوڈان کی ایک اہم بندرگاہ میں ایک بحری جہاز بھی کھڑا ہے۔

وہاں پھنسے ہندوستانی شہریوں کو نکالنے کے لئے ہنگامی منصوبہ تیار ہے۔ سوڈان میں ایک 48 سالہ ہندوستانی البرٹ آگسٹین (کیرالا) کو کہیں سے گولی آلگی تھی جس کی وجہ سے اس کی موت واقع ہوئی۔

سوڈان کی وزارت ِ صحت کے بموجب ملک میں تشدد میں کم ازکم 424 جانیں گئی ہیں اور تقریباً 3730 افراد زخمی ہوئے ہیں۔