منی لانڈرنگ کیس کے اصل ملزم سکھیش کا گورنر کو مکتوب، بھائی ،بہن پر سنگین الزامات

حیدرآباد: دوسو کروڑ روپے کے منی لانڈرنگ کیس کے اصل ملزم سکھیش چندر شیکھر رنے گورنر ڈاکٹر تمیلی سائی سوندرا راجن کے نام مکتوب تحریر کرتے ہوئے سیاسی حلقوں میں سنسنی پھیلادی۔ اس مکتوب میں انہوں نے ریاستی وزیر بلدی نظم ونسق کے ٹی راما راؤ اور بی آر ایس رکن کونسل کے کویتا (بھائی اور بہن) کے خلاف سنگین الزامات عائد کئے۔

 اپنے مکتوب میں سکھیش چندر شیکھر نے کہا کہ کے ٹی آر اور کویتا کے حامیوں کی جانب سے ان کے پاس موجود شواہد حوالہ کرنے کیلئے شدید دباؤ ڈالا جارہا ہے۔ کویتا کے خلاف انفورسمنٹ ڈائرکٹوریٹ کو حاصل ثبوت حوالہ کرنے کیلئے کہا جارہا ہے۔

ثبوت حوالہ کرنے کی صورت میں ایک سو کروڑ روپے نقد، شمس آباد میں  اراضی اور اسمبلی ٹکٹ دینے کا لالچ دیا جارہا ہے۔ انہوں نے مزید تحریر کیا کہ تقریباً 2000کروڑ روپے کی رقمی لین دین کے شواہد کو یتا کے ساتھ ہوئے واٹس ایپ چاٹ اور ریکارڈنگ ان کے پاس موجود ہے۔

میں نے ان تمام شواہد اور ثبوتوں کو فارم 65 سرٹیفکیٹ کی شکل میں انفورسمنٹ ڈائرکٹوریٹ کے حوالہ کردیا ہے۔ سکھیش نے مزید کہا کہ انہوں نے کویتا سے 15کروڑ روپے لیتے ہوئے اروند کجریوال کے لوگوں کو حوالہ کیا تھا۔ انہوں نے اس ضمن میں سی بی آئی تحقیقات عمل میں لانے گورنر ڈاکٹر تمیلی سائی سوندرا راجن سے اپیل کی۔